Til alle med verv i Stranda Idrottslag

Det er mange med verv i SIL som har fått purring på manglande politiattest frå MinIdrett. Det opplevast nok som forvirrande og irriterande. Grunn til varsel frå MinIdrett er at vi i SIL registrerer alle politiattestar i Hoopit. Dette er for å unngå dobbeltarbeid. Det er ingen, enn så lenge, integrasjon mellom MinIdrett og Hoopit. Dette er tatt opp med Hoopit, og dei har gitt tilbakemelding på at dei skal sjå om det er noko dei kan gjere på si side.

Slik det er no så kjem ikkje SIL til å starte å registrere politiattestar i MinIdrett i tillegg, dette igjen, for å unngå dobbeltarbeid. Det er dessverre ikkje mogeleg å slå av varselet frå MinIdrett. Enn så lenge må ein rett og slett berre ignorere varselet.

Vi har uansett kontroll på polititattestar via Hoopit. Dersom nokon manglar politiattest vil ein få beskjed om dette via andre kanalar enn MinIdrett.

Minner til slutt om:

• Alle med verv skal ha politiattest, veit du at du manglar dette, skal du søke, og vise fram til politiattestansvarleg.
• Du finn veiledning for korleis du skal søke, og vise fram politiattest, her på heimesida.

Mvh.

Arbeidsutvalget

SIL

Bordtennisklubben har flytta sine treningar til Strandahallen. Det betyr auka kapasitet og plass til mange fleire enn tidlegare. 

Ønsker du å vere med å spele bordtennis, eller vil ha meir informasjon om tilbodet?

Kontakt Jakob på :

Tlf: 458 96 023

E-post: jakob.skog@hotmail.com

ÅRETS RÅASTE BORDTENNIS-TURNERING

Stad: Strandahallen
Dato: Laurdag 7. juni
Tid: 12.00

Scann QR-kode eller bruk linken under for å melde dere på: https://forms.gle/aEBJ9LtrbLGVo7ah7

Stor takk til Platina Seafood som er med og støtter turneringen!

Stranda Skuleturnering er kun open for elevar som går på Stranda ungdomsskule. Det er gratis å delta, og gratis for publikum å sjå på.

Kontaktpersonar i Stranda IL handball er: 

Leiar: Ragnhild Opheim Gjerde

Nestleiar: Trond Otto Berg

Økonomiansvarleg: Anita Nordsletten Engeset

Sekretær: Anette M. Kjølås

Styremedlem: Hedda Breien

Styremedlem: Iris Marie Årdal Øverland

Stranda Alpin ønskjer at Strandafjellet skal være ein stad der alle kan lære å køyre på ski og utvikle skiferdigheiter.

Klubben tilbyr eit av landets beste treningsfasilitetar med solide trenerar og mange frivillige hjelpare. Klubbens sportslege opplegg er bygd på å tilby treningsgrupper for alle alderstrinn og nivå. Vi vil legge vekt på å utvikle skiferdigheiter gjennom variert trening, godt miljø og ha det kjekt på ski. Treninga vil innehalde frikøyring med mange øvelsar og oppgaver, ein del løypekjøring og skicross mm.

Klubben har cirka 100 medlemmar og det er gratis å være med. Løperane må være medlem av Stranda Idrottslag.

Det er eit overordnet mål for Stranda Alpin å oppretthalde denne aktiviteten.

Medlemmane i alpint nytta også ei eiga facebook-side til intern informasjon. Alle som vil kan bli medlem av denne sida. Facebook-sida er: Stranda Alpin (lukka gruppe)

Styret

Jørund Hagen Styreleiar

Joakim Relling Foreldrekontakt

Kristian Mork Styremedlem

Renate S. Kaldhussæter Styremedlem

Geir Olav Waagsbø Materialforvalter

Kjetil Dalen Styremedlem

Jane Solheimsnes Styremedlem

Kontaktinformasjon

Jørund Hagen tlf. 992 38 168 eller e-post jh@vitalseafood.no

Joakim Relling tlf. 975 71421 eller e-post joakim@stranda-anleggsservice.no

Stranda IL basket blei oppretta som ein eigen del av idrottslaget i 2021. I front for satsinga har det vore ein rekkje personar frå blant anna Litauen. Til sesongen 2022 tok laget steget vidare og blei ein del av seriespelet i Midt-Norge og har så langt gjort det veldig bra! 

Har du lyst å bli med å spele basket? Ta kontakt med ein av dei som er medlem i styret!

Styret:

Leiar: Povilas Stockus

Nestleiar: Marius Haugland Martinsen

Medlemmer: Zidrunas Kavaliauskas og Andrius Juozalenas

Stranda klatreklubb vart stifta i 2022 av ein gjeng entusiastiske klatrarar med forskjellig erfaring og interessenivå. Medlemmar klatrar både inne og ute og tar føre seg alt ifrå buldring til isklatring. Klubben har og jobba med å etablere sportsklatring og buldring i området rundt Stranda. 

Stranda klatreklubb har heilt sidan starten hatt eit ønskje om å få til eit innandørs buldresenter på Stranda. Hausten 2023 kunne dei endeleg åpne dørene til eit fantastisk anlegg midt i Stranda sentrum. Så ta turen innom Stranda buldresenter på facebook for meir informasjon. 

 Alle frå nybegynnarar til erfarne fjellklatrarar er velkomen til å delta på både formelle og uformelle samlingar og turar som klubben arrangerer. Ta kontakt med Stranda klatreklubb på facebook, eller gi eit vink til følgjande personar om de er interessert: 

Leiar: Kristoffer Fauske Helgås - 99368123 

Nestleiar: Ingvild Hegge Eriksen - 90810561 

Medlem: Kay Van Amerongen - 47247062 

Medlem: Hans Marius Ringdal - 40093676 

Medlem: Vegar Emdal - 91580368  

Stranda IL bordtennis starta våren -22 og møtast ukentleg for å trene bordtennis og ha det gøy saman i Strandahallen. Vi har seks bord, baller og racketar til utlån.

Vi arrangerer trening for barn, ungdom og vaksne, samt open hall som er gratis der alle er velkomen til å delta. 

Er du interessert i å vere med? Vi har ei gruppe på hoopit, der finn du oppdatert informasjon om treningstider.

https://app.hoopit.io/join/stranda-idrottslag-260207/open/bordtennisgruppe-986327

Kontaktinformasjon

Jakob Skog på tlf. 458 96 023 eller e-post jakob.skog@hotmail.com.

Sjekk også vår facebookside, her finn du mer informasjon, søk etter "Stranda Bordtennis".

Stranda Langrenn ønskar at langrenn skal vere ein sosial arena på tvers av aldersgrupper og etnisitet - eit inkluderande miljø der alle er velkomne og får oppleve skiglede og meistring.

Vinteren 2025 vert det aktivitet kvar måndag, annakvar med skileik og Telenorkarusell,

Oppmøte ved langrennshytta kl.17.30 – 19.00.

Langrennshytta vil vere open slik at små og store kan gå inn å varme seg etter aktivitetane.

For meir informasjon kan ein sjekke ut facebook-gruppa vår ved å trykke her.

Kontaktinformasjon

Martin André Kristoffersen 992 91 625

Martin Espelund 988 21 998

Maria Tryggestad 980 71 086

Jan Erik Westerås 907 60 268

Tekst om friidrett

Gymleik er eit alternativ for born mellom to og seks år. Ein dag i veka får ein moglegheit til å delta på foreldrestyrt aktivitet i ein time i gymsalen, på Ringstad skule. Ungane vert delt inn i grupper etter fødselsår. Eit fantastisk tilbod, som vi håper mange vil vere med på.

Deltakerkrav er medlemsskap i idrottslaget.

Vil du vere med?

Kontaktinformasjon

Espen Hove på tlf. 412 55 129 

Rutiner for politiattest i Stranda IL

• Leiar i kvar undergruppe har det overordna ansvaret for at lagleiarar, trenarar og andre tillitsvalde har politiattest. Undergruppene kan ha eigne ressursar til dette arbeidet, sjekk med di gruppe.
• Før ein søkjer om politiattest må ein fylle ut skjemaet «Stadfesting av føremål»,  skjema finn du ved å trykke her.  
• Er du under 18 år må du fylle ut og legge ved eit ekstra skjema med signatur av føresette/verge. Skjema kan lastast på politiet sine sider ved å trykke her
• Fyll ut gjenståande punkt i skjema ved å skrive ut, eller digitalt. Lagre, eller ta bildet av skjema, for å kunne laste det opp seinare i søknadsprosessen.
• Søknad om politiattest finn du på www.politiet.no/tjenester/politiattest/politiattest-sok-pa-nett/
• Du søkjer elektronisk ved å logge inn med BankID.
• I feltet for kategori og føremål velje du «Friviljuge organisasjonar».
• Skjema «Stadfesting av føremål» som du fylte ut i stad må lastast opp frå telefon, eller PC, som vedlegg til søknad.
• Send søknad med vedlegg ved å trykke «send inn».
• Når politiattesten er motteken skal du vise denne til attestansvarleg ved Stranda IL, Joakim Nykrem. Tlf /e-post 40610910 / joakimnykrem@gmail.com 

Politiattestar vert ikkje lagra av Stranda IL. Kopiar, fysisk og/eller digitalt, vert sletta/makulert omgåande.

Rettleiing til utfylling av skjema «Stadfesting av føremål»

• Punkt 1. Fullt namn
• Punkt 2. Fødselsnummer
• Punkt 3. Skriv inn di rolle i klubben, til dømes trenar, lagleiar osv. T.d kan det stå slik Trenar i Stranda Fotball, underlagt Stranda Idrottslag.
• Punkt 5. Skriv inn månad og år
• Punkt 6. Velg fast stilling/oppdrag/verv
• Punkt 12. Fyll ut stad og dagens dato 

Barneidrettsforsikring

Alle born som er medlem av ein klubb tilslutta Norges idrettsforbund (NIF), eller som deltek i organisert aktivitet i klubbens regi, er forsikra gjennom Gjensidige barneidrettsforsikring. Forsikringen omfattar born til den dato dei fyller 13 år. Forsikringspremien betalast av NIF.

Dette innebær at alle barn til og med 12 år, som deltek i idrettsaktivitet i regi av SSK, er forsikra. I tillegg gjeld forsikringa for trenerar, leiarar og oppnevnte dommere som bistår ved organisert aktivitet for born under 13 år.

Meld skade

Dersom ein skade oppstår under ein aktivitet i regi av Stranda IL skal skaden meldast elektronisk på nettstaden til idrettshelse ved å trykke her.

All diagnostisering og behandling utover akuttbehandling skal bestillast av Idrettens Skadetelefon, utan dette bortfell retten til erstatning.

Tlf.nr til Idrettens Skadetelefon: 02033

Klubbforsikring

Alle utøverar over 12 år er dekt av Stranda IL`s eigen klubbforsikring. Det forutsett at medlemskap og deltageravgift er betalt. Utøvarar som er aktiv i håndball og basketball betalar eigen lisens til det respektive forbundet for å være dekket av forsikring ved oppstått skade under kamp.

Stranda IL sine reglar for trygg transport til arrangement:

• All transport til og frå arrangement skal planleggast med god tidsmargin.
• Fartsgrensene SKAL alltid haldast.
• Sjåføren har ansvar for at alle brukar bilbelte heile tida.
• Ein skal kun nytte køyrety som er i forskriftsmessig og forsvarleg stand.
• Bagasje skal leggast i bagasjerom, og alle lause gjenstandar må vere sikra.
• Ein skal nytte erfarne sjåførar. Lærekøyring skal ikkje førekome.
• Talet på passasjerar må ikkje overstige talet køyretyet er godkjend for.
• Sikring av barn (tryggtrafikk.no)
• Barn under 135 cm skal bruke godkjent barnesikringsutstyr
• Barn mellom 135- 150 cm og under 36kg skal bruke godkjent barnesikringsutstyr dersom slikt utstyr finns i bilen.

Varsle ved uønska hendingar

Innleiing
Alle med ansvar i Stranda Idrottslag (trenarar, oppmenn, lagleiarar, lagkameratar, styremedlem, kioskvakt osv.) skal gripe inn og varsle dersom hendingar som beskrive her er gjort kjent for den enkelte.

SIL sitt ansvar

Stranda Idrottslag skal ta alle meldingar alvorleg. Der styret i SIL, saman med andre mynde, handterer saker knytt til uønska hendingar. Meldingar skal handsamast same dag som dei er gjort kjent for styret i SIL. SIL kontaktar politi eller andre relevant mynde ved behov.

Prinsipp for handtering av saker

• Ta alle saker alvorleg og handter dei gjennom hovudlaget i SIL
• Alle straffbare handlingar skal anmeldast
• Ta vare på dei involverte og sørg for tryggleik
• Følg opp saka til dei involverte føle seg trygge og ivareteken

Har du opplevd sjølv eller sett, høyrt eller mistenker at nokon andre er utsett for ei uønska hending?

Kva skal du gjere?

• Har du opplevd ein uønska situasjon, snakk med nokon du stolar på.
• Har du sett, høyrt eller mistekenker at nokon andre er utsett for ei uønska hending, hjelp og støtt vedkomande
• Varsle saka til Stranda Idrottslag og andre aktuelle partar, få hjelp frå nokon du stolar på dersom det er vanskeleg å varsle vidare.

Kven kan du varsle?

• Snakk med trenar, lagleiar eller anna person med verv i Stranda idrottslag
• Stranda Idrottslag, kontaktinformasjon finn du på https://www.strandail.no
• Politiet på 02800 (112 ved akutte tilfeller)
• Helsesjukepleiar eller fastlege
• Alarmtelefon for barn og unge på 116 111

Seksuell trakassering og overgrep
Kva er seksuell trakassering og overgrep?

• Seksuell trakassering: Uønskt seksuell merksemd som er plagsam og/eller opplevast som overskridande av den som er utsett for hendinga.
• Seksuelle overgrep: Seksuelle handlingar utan samtykke. Dette er straffbart og skal meldast til politiet.

Døme på straffbare handlingar:

• Valdtekt
• Berøring av kjønnsorgan og bryst
• Å ta, lagre eller formidle seksualiserte bilete

Vald og truslar
Kva er vald og truslar?

• Vald: Handlingar som skadar, smerter, skremmer eller krenker.
• Truslar: Ord eller handlingar som skaper alvorleg frykt.

Mobbing
Kva er mobbing?

• Fysisk mobbing: Slå, sparke, lugge, spytte, dytte osv.
• Verbal mobbing: Seie nedlatande eller krenkjande ting, true, spreie rykter.
• Psykisk mobbing: Ryktespreiing, manipulering, utestenging.
• Telefon- eller teknologimobbing: Krenkjande eller truande meldingar eller kommentarar på internett.

Rasisme og diskriminering
Kva er rasisme og diskriminering?

• Diskriminering: Urettferdig behandling basert på kjønn, etnisitet, religion, funksjonsnedsetting osv.
• Rasisme: Forskjellsbehandling basert på rase, hudfarge, avstamming eller nasjonal/etnisk opprinnelse.

For meir utfyllande informasjon sjå dokumentet "regelverk for uønska hendingar" ved å trykke på lenka under.

Regelverk for uønska hendingar

LOVNORM FOR IDRETTSLAG

Vedteken av Idrettsstyret 16. november 2021.

LOV FOR STRANDA IDROTTSLAG

Stifta 15.08.1914

Sist endra 20.11.1995.

§ 1 Formål

Formålet til idrettslaget er å drive idrett organisert i Norges idrettsforbund og olympiske og paralympiske komité (NIF). Arbeidet skal vere prega av frivillig innsats, demokrati, lojalitet og likeverd. All idrettsleg aktivitet skal byggje på grunnverdiar som idrettsglede, fellesskap, helse og ærlegdom.

§ 2 Organisasjon

(1) Idrettslaget er sjølveigande og frittståande med berre personlege medlemmer.

(2) Idrettslaget er medlem av Norges Skiforbund, Norges Fotballforbund, Norges Friidrettsforbund, Norges Håndballforbund. For reglar om plikta idrettslaget har til å vere medlem av eit særforbund gjeld NIFs lov § 10-1 (4).

(3) Idrettslaget er medlem av NIF gjennom Møre og Romdal Idrettskrets og er tilslutta Stranda Idrettsråd.

(4) For reglar om representasjonsrett gjeld NIFs lov § 10-3.

(5) For reglar om plikta idrettslaget har til å halde regelverket og vedtaka til overordna organisasjonsledd gjeld NIFs lov §§ 2-2 og 2-3.

§ 3 Medlemmer

(1) For reglar om opptak av medlemmer, utmelding, fråtaking av medlemskap m.m. gjeld NIFs lov §§ 10-4 og 10-6.

(2) For plikta idrettslaget har til å registrere opplysningar i medlems- og organisasjonsregisteret til idretten gjeld NIFs lov § 10-5 og forskrift om medlems- og organisasjonsregisteret til idretten med utfyllande reglar.

§ 4 Kjønnsfordeling

For reglar om kjønnsfordeling i styre, utval m.m. og ved representasjon til årsmøte/ting i

overordna organisasjonsledd gjeld NIFs lov § 2-4.

§ 5 Generelle reglar om stemmerett, kvalifisering til val, forslagsrett m.m.

For reglar om stemmerett, kvalifisering til val og forslagsrett gjeld NIFs lov §§ 2-5, 2-6 og 2-7.

§ 6 Inhabilitet

For reglar om inhabilitet gjeld NIFs lov § 2-8.

§ 7 Vedtaksførleik, fleirtalskrav og protokoll

For reglar om vedtaksførleik, fleirtalskrav og protokoll gjeld NIFs lov § 2-9.

§ 8 Refusjon av utgifter og godtgjering

For reglar om refusjon av utgifter og godtgjering gjeld NIFs lov § 2-10.

§ 9 Regnskap og revisjon m.m.

For reglar om rekneskap og revisjon m.m. gjeld NIFs lov §§ 1-7, 2-11, 2-13 og 2-14.

§ 10 Årsmøtet

(1) Årsmøtet er det høgaste styringsorganet i idrettslaget, og det blir halde kvart år innan utgangen av mars månad.

(2) Ordinært og ekstraordinært årsmøte blir gjennomført i samsvar med denne lova og NIFs lov §§ 2-15, 2-16, 2-17, 2-19, 2-20.

(3) Oppgåvene til årsmøtet:

1. godkjenne dei som har stemmerett

2. velje dirigent(ar)

3. velje protokollførar(ar)

4. velje to medlemmer til å skrive under protokollen

5. godkjenne forretningsordenen

6. godkjenne innkallinga

7. godkjenne saklista

8. behandle årsmeldinga frå idrettslaget

9. behandle

a. rekneskapen til idrettslaget

b. den økonomiske meldinga frå styret

c. meldinga frå kontrollutvalet

d. eventuell melding frå engasjert revisor

10. behandle saker som kjem fram av godkjend sakliste

11. fastsetje

a. medlemskontingent på minst kr 50

b. eventuell treningsavgift, eller gi styret fullmakt til å fastsetje treningsavgifter

12. vedta budsjettet til idrettslaget

13. behandle organisasjonsplanen til idrettslaget

14. Velje

a. styre med leiar, nestleiar, 3 styremedlemar og 2 varamedlemar

b. kontrollutval med 2 medlemar og 1 varamedlem

c. representantar til ting og møte i dei organisasjonsledda der idrettslaget har representasjonsrett, eller gi styret fullmakt til å utnemne representantane

d. valkomité med leiar, 3 medlemar og 1 varamedlem

e. eventuelt andre val i samsvar med organisasjonsplanen til idrettslaget

15. avgjere om det skal engasjerast revisor til å revidere rekneskapen til idrettslaget

Leiarar og nestleiarar skal veljast enkeltvis. Dei andre medlemmene skal veljast samla. Deretter skal varamedlemmene veljast samla. Der det blir valt fleire varamedlemmer, skal det veljast 1. varamedlem, 2. varamedlem osv.

For reglar om stemmegivinga på årsmøtet gjeld NIFs lov § 2-21.

(4) For reglar om innkalling og gjennomføring av ekstraordinært årsmøte gjeld NIFs lov

§ 2-19.

§ 11 Styret i idrettslaget

(1) Idrettslaget blir leidd og forplikta av styret, som representerer idrettslaget eksternt.

(2) Styret er den høgaste styresmakta til idrettslaget mellom årsmøta, men visse avgjerder kan berre vedtakast av årsmøtet i samsvar med § 10 (3) og NIFs lov § 2-22.

(3) Forvaltninga av, og tilsynet med, alle delar av idrettslagsverksemda høyrer under styret. Styret skal sørgje for

- at formålet med idrettslaget blir oppfylt

- at idrettslagsverksemda og økonomistyringa er forsvarleg organisert

- at avgjerder fattast i samsvar med regelverket og vedtaket til overordna organisasjonsledd, lova til idrettslaget og årsmøtevedtaket

- at det blir registrert opplysningar i samsvar med § 3 (2)

- at det blir utnemnt ein ansvarleg for politiattestordninga, dersom idrettslaget organiserer idrett for mindreårige eller personar med utviklingshemming

- at det blir utnemnt ein ansvarleg for barneidretten, dersom idrettslaget organiserer barneidrett

(4) Styret kan utnemne komitear/utval for handtering av kontinuerlege eller enkeltståande oppgåver, og utarbeide mandat/instruks for dei.

(5) Styret skal oppnemne representantar til årsmøte/ting i overordna organisasjonsledd dersom årsmøtet ikkje har valt representantar.

(6) Styret skal halde møte når leiaren bestemmer det, eller når minst to av styremedlemmene krev det.

§ 12 Kontrollutval, valkomité

(1) For reglar om kontrollutvalet gjeld NIFs lov § 2-12.

(2) For reglar om valkomiteen gjeld NIFs lov § 2-18.

§ 13 Grupper

(1) Årsmøtet i idrettslaget kan vedta å opprette og leggje ned grupper, og korleis dei skal organiserast og leiast. Dette blir vedteke i samband med den årlege behandlinga av organisasjonsplanen til idrettslaget, jf. § 10 (3) pkt. 13. Innmelding og utmelding av særforbund krev lovendring, jf. § 2 (2).

(2) Dersom årsmøtet i idrettslaget ved behandlinga av organisasjonsplanen har vedteke å opprette grupper med gruppestyre, gjeld følgjande:

a) Kvar gruppe skal ha eit gruppestyre på minst tre medlemmer. Gruppestyret blir valt på årsmøtet eller blir utnemnt av styret etter fullmakt frå årsmøtet.

b) Gruppa bør ha minst eitt årleg møte der gruppa diskuterer økonomien i gruppa og aktiviteten i gruppa, foreslår kandidatar til gruppestyret og dessutan gir eventuelle innspel til saker som blir behandla av styret eller årsmøtet.

c) Gruppestyret konstituerer seg sjølv, med mindre årsmøtet har vedteke noko anna.

d) Gruppestyret fastset ei eventuell årleg treningsavgift innanfor ramma av fullmakt som er gjeven av årsmøtet.

(3) Gruppestyret eller representantar for grupper kan ikkje inngå avtalar eller på annan måte forplikte idrettslaget utan fullmakt frå hovudstyret.

§ 14 Lovendring

For reglar om lovendring gjeld NIFs lov § 2-2.

§ 15 Oppløysing, utmelding osb.

(1) Idrettslaget kan vedta oppløysing

a. ved eit einstemmig vedtak om oppløysing på årsmøtet, eller

b. ved å vedta oppløysing med 2/3 fleirtal på to påfølgjande årsmøter, der det etterfølgjande årsmøtet må haldast minimum tre månader og maksimum 6 månader seinare.

Ein føresetnad for eit gyldig vedtak om oppløysing er at idrettslaget skriftleg varslar idrettskrinsen og særforbundet seinast 14 dagar før årsmøtet til idrettslaget behandlar forslag om oppløysing.

(2) Samanslutning med andre idrettslag blir ikkje rekna som oppløysing av idrettslaget. Vedtak om samanslutning eller utmelding frå særforbund, og nødvendige lovendringar i tilknyting til dette, må gjerast med 2/3 fleirtal av årsmøtet.

(3) For reglar om utmelding og tap av medlemskap i NIF gjeld NIFs lov § 10-2.

(4) Ved utmelding eller tap av medlemskap skal eigedelane til idrettslaget som er opparbeidde som ei direkte følgje av medlemskapen til idrettslaget i NIF, gå til eit formål som er godkjent av Idrettsstyret. Ved oppløysing eller anna opphøyr av idrettslaget går overskytande midlar i laget etter avvikling til eit formål som er godkjent av idrettskrinsen.